ພາຍຫລັງທີ່ ເກີດມີໄພພິບັດ ນໍ້າຖ້ວມ ຢູ່ 3 ເມືອງຂອງແຂວງອຸດົມໄຊ ໃນທ້າຍເດືອນສິງຫາ ຜ່ານມາ ໄດ້ມີຫລາຍພາກສ່ວນ ທັງພາກລັດ ແລະ ເອກະຊົນ ທັງພາຍໃນ ແລະ ຕ່າງປະເທດ ໄດ້ນຳເອົາວັດຖຸ,ປັດໃຈ,ເຄື່ອງອຸປະໂພກ – ບໍລິໂພກ ມອບໃຫ້ແຂວງອຸດົມໄຊ ເພື່ອນໍາໄປຊ່ວຍເຫລືອ ບັນເທົ່າທຸກ ໃຫ້ບັນດາປະຊາຊົນ ທີ່ໄດ້ຮັບຜົນກະທົບ ຈາກໄພພິບັດ ດັ່ງກ່າວ ມາຮອດປັດຈຸບັນນີ້ ກໍຍັງມີຫລາຍພາກສ່ວນ ສືບຕໍ່ ເຂົ້າໃຫ້ການຊ່ວຍເຫຼືອ ຢ່າງຕໍ່ເນື່ອງ
![](https://www.oudomxay.gov.la/site/wp-content/uploads/2022/09/309440744_121747250659777_3054175007131653317_n.jpg)
![](https://www.oudomxay.gov.la/site/wp-content/uploads/2022/09/310206263_121747263993109_5603403379447288565_n.jpg)
ໃນນີ້ ບໍລິສັດ ຈຽນຟອງ ພັດທະນາຢາງພາລາ ມອບເງິນສົດ ຈຳນວນ 20 ລ້ານກີບ ພ້ອມດ້ວຍ ເຂົ້າສານ,ຜ້າຫົ່ມ ແລະ ສາດ ຈໍານວນຫນຶ່ງ ລວມເປັນມູນຄ່າທັງຫມົດ 30 ລ້ານກີບ ແລະ ບໍລິສັດ ເກດມະນີ ກໍ່ສ້າງ – ຂົວທາງ ຈໍາກັດ ມອບ ເງິນສົດ ຈໍານວນ 20 ລ້ານກີບ ເຊິ່ງຕາງຫນ້າການນຳແຂວງອຸດົມໄຊ ຮັບໂດຍທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ.
ໂອກາດ ດັ່ງກ່າວ ທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ ໄດ້ສະແດງຄວາມຂອບໃຈ ມາຍັງ ທັງ 2 ບໍລິສັດ ທີ່ໃຫ້ການຊ່ວຍເຫລືອ ແລະ ອຸປະຖຳຄ້ຳຊູ ໃນຄັ້ງນີ້ ແລະ ຫວັງວ່າຈະໄດ້ຮັບການຊ່ວຍເຫລືອ ໃນໂອກາດຫນ້າຕື່ມອີກ. ສ່ວນເງິນທີ່ໄດ້ຮັບໃນຄັ້ງນີ້ ແມ່ນຈະນຳໃຊ້ເຂົ້າໃນການຊູກຍູ້,ຊ່ວຍເຫລືອ ແລະ ຟື້ນຟູ ຊີວິດການເປັນຢູ່ຂອງປະຊາຊົນ ໃຫ້ກັບຄືນສູ່ສະພາບປົກກະຕິ ໂດຍໄວ ແລະ ເຂົ້າສານ,ເຄື່ອງນຸ່ງຫົ່ມ,ເຄື່ອງໃຊ້ຕ່າງໆ ແມ່ນຈະໄດ້ນຳໄປມອບໃຫ້ປະຊາຊົນທີ່ໄດ້ຮັບຜົນກະທົບ ຈາກໄພພິບັດນ້ຳຖ້ວມ ໃຫ້ທົ່ວເຖິງ ແລະ ທັນກັບສະພາບການ.