ທີ່ຕັ້ງ:
ຫ້ອງວ່າການແຂວງ ຂຽນເປັນຕົວອັກສອນຫຍໍ “ຫວຂ” ເປັນກົງຈັກຈັດຕັ້ງໜຶ່ງ ໃນໂຄງການປະກອບກົງຈັກຂອງອົງຄະນະພັກ ແລະ ອົງການປົກຄອງຂັ້ນແຂວງ ມີຖານະທຽບເທົ່າກັບຄະນະພັກ, ພະແນກການ ແລະ ອົງການທຽບເທົ່າພະແນກຢູ່ຂັ້ນແຂວງ (ເຂດທີ່ເປັນທີ່ຕັ້ງສຳນັກງານຫ້ອງວ່າການແຂວງ ມີຊື່ວ່າ: ສຳນັກງານແຂວງ)
ພາລະບົດບາດ
ຫ້ອງວ່າການແຂວງ ມີພາລະບົບບົດບາດເປັນເສນາທິການໃຫ້ແກ່ຄະນະບໍລິຫານງານພັກແຂວງ, ຄະນະປະຈຳພັກແຂວງ, ເລຂາພັກແຂວງ, ຮອງເລຂາພັກແຂວງ, ຮອງເຈົ້າແຂວງ, ອົງການປົກຄອງແຂວງ, ເຈົ້າແຂວງ, ຮອງເຈົ້າແຂວງ ໃນການອຳນວຍຄວາມສະດວກ, ຄວບຄຸມ, ຊຸກຍູ້ ແລະ ຕິດຕາມການຈັດຕັ້ງປະຕິບັດມະຕິ ຂອງກອງປະຊຸມຄະນະບໍລິຫານງານພັກ ແລະ ກອງປະຊຸມອົງການປົກຄອງແຂວງ; ເປັນໃຈກາງພົວພັນປະສານງານກັບອົງການຈັດຕັ້ງພັກ-ລັດຂັ້ນສູນກາງ, ບັນດາພະແນກການອ້ອມຂ້າງແຂວງ, ບັນດາເມືອງ ແລະ ອົງການຈັດຕັ້ງຂັ້ນຕ່າງໆ; ເປັນຜູ້ບໍລິຫານຮັບໃຊ້ການເຄື່ອນໄຫວວຽກງານຂອງການນຳແຂວງ ແລະ ຄຸ້ມຄອງບໍລິຫານພາຍໃນຫ້ອງວ່າການແຂວງ
ໜ້າທີ
- ສ້າງແຜນການເຄື່ອນໄຫວວຽກງານຂອງຄະນະບໍລຫານງານພັກແຂວງ, ເລຂາພັກແຂວງ, ຄະນະປະຈຳພັກແຂວງ ໃນແຕ່ລະໄລຍະ ເພື່ອສະເໜີຂັ້ນເທີງພິຈາລະນາ; ເປັນໃຈກາງປະສານງານ, ຊຸກຍູ້, ຕິດຕາມ, ກວດກາບັນດາອົງການຈັດຕັ້ງທີ່ຂື້ນກັບອົງຄະນະພັກແຂວງ, ໃນການຈັດຕັ້ງປະຕິບັດແຜນການເຄື່ອນໄຫວ
- ກຽມເນື້ອໃນ, ລະບຽບ, ຕາຕະລາງ, ວາລະ, ຄຳເຫັນເຈາະຈີ້ມ, ຂໍ້ສະຫຼຸບ, ບົດບັນທຶກ, ບົດຄຳເຫັນໂອ້ລົມ ແລະ ແຈ້ງການກອງປະຊຸມສະໄໝສາມັນ ແລະ ວິສາມັນຂອງອົງຄະນະພັກແຂວງ, ກຽມເນື້ອໃນ, ບົດບັນທຶກການພົບປະແຂກພາຍໃນ ແລະ ຕ່າງປະເທດ
- ຊ່ວຍຄະນະປະຈຳຊຸກຍູ້, ຕິດຕາມ, ກວດກາ ແລະ ຄົ້ນຄ້ວາ-ສັງລວມສະພາບການຈັດຕັ້ງປະຕິບັດແນວທາງ, ແຜນນະໂຍບາຍ, ມະຕິ, ຄຳສັ່ງ, ຂອງສູນກາງພັກ ແລະ ມະຕິ, ຄຳສັ່ງ, ແຜນການ, ແຜນງານ ຂອງຄະນະບໍລິຫານງານພັກແຂວງ ພ້ອມທັງສະເໜີວິທີແກ້ໄຂຖືກຕ້ອງ ແລະ ເໝາະສົມໃຫ້ແກ່ການນຳ ພິຈາລະນາ ແລະ ມີທິດຊີນຳໃນການຈັດຕັ້ງປະຕິບັດ
- ຄົ້ນຄ້ວາ, ກະກຽມ ແລະ ຮຽບຮຽງເອກະສານຕ່າງໆຂອງຄະນະປະຈຳພັກແຂວງ, ເລຂາພັກແຂວງ ເພື່ອພິຈາລະນາ, ກວດຜ່ານ, ຮຽບຮຽງ, ມີຄຳເຫັນໃສ່ເອກະສານ, ບົດລາຍງານ ແລະ ນິຕິກຳຕ່າງໆຈາກພາກສ່ວນທີ່ກ່ຽວຂ້ອງ ທີ່ສະເໜີລາຍງານ, ຂໍທິດຊີ້ນຳ, ຂໍການຕົກລົງຈາກເລຂາພັກແຂວງ, ຮອງເລຂາພັກແຂວງ ແລະ ຜູ້ທີ່ຖືກມອບສິດຈາກສະຫາຍເລຂາພັກແຂວງ; ບັນທຶກຜົນຂອງກອງປະຊຸມສ່ອງແສງລາຍງານວຽກງານຕ່າງໆ ແລະ ຜັນຂະຫຍາຍເພື່ອນຳໄປຈັດຕັ້ງປະຕິບັດໃຫ້ມີຜົນສຳເລັດ
- ສຳເນົາ ແລະ ປົກປັກຮັກສາ ບັນດາຂໍ້ມູນ, ເອກະສານຕ່າງໆຂອງພັກໃຫ້ມີຄວາມປອດໄສ, ບໍ່ໃຫ້ຕົກເຮຍເສຍຫາຍ, ບໍ່ໃຫ້ມີການປ້ອມແປງ ແລະບໍ່ໃຫ້ເສຍຄວາມລັບ
- ບໍລິການຮັບໃຊ້ດ້ານພິທີການຕ່າງໆຂອງວຽກພັກ, ກະກຽມຈັດຕັ້ງ ແລະ ບັນທຶກກອງປະຊຸມຄະນະປະຈຳພັກແຂວງ, ກອງປະຊຸມ ຄົບຄະນະບໍລິຫານງານພັກແຂວງ ແລະ ວຽກງານຕ່າງໆທີ່ຢູ່ໃນຄວາມຮັບຜິດຊອບຂອງຄະນະບໍລິຫານງານພັກແຂວງ ປະຈຳແຕ່ລະໄລຍະ
- ຊ່ວຍເລຂາພັກແຂວງ, ຄະນະປະຈຳພັກແຂວງ ກ່ຽວກັບວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດ ຕາມການມອບໝາຍ
- ເປັນໃຈກາງປະສານງານສົມທົບກັບຂະແໜງການທີ່ກ່ຽວຂ້ອງ ໃນການຕິດຕາມ, ກວດກາ ແລະ ຊຸກຍູ້ປັບປຸງລະບົບກົງຈັກການຈັດຕັ້ງພັກຢູ່ຂັ້ນຮາກຖານເຊັ່ນ: ສຳນັກງານ, ອົງການ, ໂຮງຮຽນ, ໂຮງໝໍ, ວິສະຫະກິດຕ່າງໆ ຢູ່ອ້ອມຂ້າງແຂວງ, ເມືອງ ແລະ ກຸ່ມບ້ານ-ບ້ານ
- ປະສານກັບພາກສ່ວນທີ່ກ່ຽວຂ້ອງແຕ່ລະຂັ້ນເພື່ອສຶກສາອົບຮົມ ການເມືອງແນວຄິດໃຫ້ປະຊາຊົນ ຊັ້ນຄົນຕ່າງໆ ເພື່ອເພີ່ມສະຕິເປັນເຈົ້າ ໃນການພັດທະນາຕົນເອງ ແລະ ພັດທະນາປະເທດຊາດ, ມີສະຕິເຄົາລົບ ແລະ ປະຕິບັດລະບຽບກົດຫມາຍ, ເສີມຂະຫຍາຍມູນເຊື້ອ ສາມັກຄີ ປອງດອງ ລະຫ່ວາງ ປະຊາຊົນບັນດາເຜົ່າ
- ຮັບເອົາ ແລະ ມີຄໍາເຫັນຕໍ່ຫນັງສືສະເຫນີ, ຄໍາຮ້ອງ, ອໍານວຍຄວາມສະດວກການເຂົ້າພົບການນໍາ ຂອງແຂກ ແລະ ອື່ນໆ ທີ່ສະເຫນີເຖິງຄະນະປະຈໍາພັກແຂວງ, ເລຂາພັກແຂວງ ແລະ ຮອງເລຂາພັກແຂວງຄົ້ນຄ້ວາພິຈາລະນາ
- ບໍລິການຮັບໃຊ້ ດ້ານເນື້ອໃນ ແລະ ພິທີການຕ່າງໆ ໃຫ້ແກ່ຄະນະປະຈໍາພັກແຂວງ, ເລຂາພັກແຂວງ, ຮອງເລຂາພັກແຂວງ, ເປັນເຈົ້າການກະກຽມ, ບັນທຶກການພົບປະກັນຕ້ອນຮັບແຂກ ລະດັບຕ່າງໆທັງພາຍໃນ ແລະ ຕ່າງປະເທດ, ປະຕິບັດຫນ້າທີ່ຮັບໃຊ້ການນໍາ ແລະ ບໍລິການຮັບໃຊ້ໃຫ້ແກ່ ພາກສ່ວນຕ່າງໆ ພ້ອມທັງຄົ້ນຄ້ວາ ແລະ ສ້າງສິ່ງອໍານວຍຄວາມສະດວກດ້ານແຜນວຽກ, ແຜນຄົນ, ແຜນເງິນ, ແຜນເວລາ, ແຜນພາຫະນະ ແລະ ແຜນປ້ອງກັນຄວາມສະຫງົບ-ປອດໄພ ໃນການເຮັດວຽກ, ການເຄື່ອນໄຫວລົງເຮັດວຽກຢູ່ຮາກຖານ, ຢູ່ຕ່າງເເຂວງ ແລະ ຕ່າງປະເທດ ຂອງຄະນະປະຈໍາພັກແຂວງ, ເລຂາພັກແຂວງ, ຮອງເລຂາພັກແຂວງ
- ປະຕິບັດຕາມຫນ້າທີ່ອື່ນໆ ທີ່ເລຂາພັກແຂວງ, ຮອງເລຂາພັກແຂວງ ແລະ ຄະນະປະຈໍາພັກແຂວງມອບຫມາຍ