ລະຫວ່າງ ວັນທີ 22 – 23 ມັງກອນ 2024 ນີ້ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ພ້ອມດ້ວຍຄະນະ ລົງເຄື່ອນໄຫວ ຢ້ຽມຢາມ ແລະ ເຮັດວຽກ ຢູ່ ແຂວງອຸດົມໄຊ ໂດຍການຕ້ອນຮັບຂອງ ທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ ພ້ອມດ້ວຍການນຳຂອງແຂວງ.
![](https://www.oudomxay.gov.la/wp-content/uploads/2024/02/WhatsApp-Image-2024-01-23-at-20.32.34-4.jpeg)
![](https://www.oudomxay.gov.la/wp-content/uploads/2024/02/WhatsApp-Image-2024-01-23-at-20.32.34-3.jpeg)
![](https://www.oudomxay.gov.la/wp-content/uploads/2024/02/WhatsApp-Image-2024-01-23-at-20.35.11.jpeg)
ການຢ້ຽມຢາມ ແຂວງອຸດົມໄຊ ຄັ້ງນີ້
ກ່ອນອື່ນ ທ່ານຮອງປະທານປະເທດ ໄດ້ເຂົ້າພົບປະຄະນະປະຈໍາພັກແຂວງ ຮັບຟັງການລາຍງານສະພາບລວມ ວຽກງານຮອບດ້ານຂອງແຂວງອຸດົມໄຊ ໃນໄລຍະຜ່ານມາ ເປັນຕົ້ນແມ່ນ ວຽກງານພັກ – ພະນັກງານ, ວຽກງານເສດຖະກິດ – ສັງຄົມ, ວຽກງານປ້ອງກັນຊາດ – ປ້ອງກັນຄວາມສະຫງົບ. ຈາກນັ້ນ ທ່ານໄດ້ເດີນທາງໄປ ເມືອງນາຫມໍ້ ເພື່ອພົບປະ, ຢ້ຽມຢາມ ປະຊາຊົນ ບ້ານນາຫມໍ້ໃຕ້ ທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ – ຈີນ ຊ່ວງຜ່ານ ແຂວງອຸດົມໄຊ ໂດຍໄດ້ຮັບການຕ້ອນຮັບ ຈາກ ທ່ານ ປອ ວົງສະຫວັນ ໄຊຍະວົງ ເຈົ້າເມືອງ-ເມືອງນາຫມໍ້ ພ້ອມດ້ວຍການນຳເມືອງ, ອົງການປົກຄອງບ້ານ ແລະ ປະຊາຊົນ ພາຍໃນບ້ານນາມໍ້ໃຕ້ ທ່ານໄດ້ຮັບຟັງການລາຍງານ ກ່ຽວກັບ ສະພາບໂດຍລວມຂອງເມືອງ ລວມທັງ ບາງບັນຫາກ່ຽວກັບການຍົກຍ້າຍ ປະຊາຊົນ ທີ່ຖືກໂຄງການກໍ່ສ້າງເສັ້ນທາງລົດໄຟ ລາວ – ຈີນ ຈາກບ້ານເກົ່າມາຢູ່ບ້ານຈັດສັນໃຫມ່. ສະເພາະບ້ານນີ້ ເຊິ່ງມີປະຊາຊົນໄດ້ຮັບການຍົກຍ້າຍ ໃນຄັ້ງນີ້ ມີທັງຫມົດ 60 ຫລັງຄາເຮືອນ ໃນນີ້ ມີ 41 ຫລັງຄາເຮືອນ ທີ່ຍົກຍ້າຍເຂົ້າມາອາໄສຢູ່ບ້ານຈັດສັນ ແລະ ອີກຈຳນວນຫນຶ່ງ ແມ່ນຮັບການຊົດເຊີຍເປັນເງິນສົດ.
![](https://www.oudomxay.gov.la/wp-content/uploads/2024/02/WhatsApp-Image-2024-01-23-at-20.33.24.jpeg)
![](https://www.oudomxay.gov.la/wp-content/uploads/2024/02/WhatsApp-Image-2024-01-23-at-20.32.34.jpeg)
![](https://www.oudomxay.gov.la/wp-content/uploads/2024/02/WhatsApp-Image-2024-01-23-at-20.33.47.jpeg)
ໂອກາດດັ່ງກ່າວ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໄດ້ມີຄຳຄິດ ຄຳເຫັນ ໂອ້ລົມ ປະຊາຊົນ ພ້ອມທັງ ນຳເອົາອຸປະກອນການຮຽນຈຳນວນຫນຶ່ງ ໂດຍສະເພາະແມ່ນ ປຶ້ມຂຽນ, ບິກ, ສໍ ມາມອບໃຫ້ແກ່ນ້ອງນັກຮຽນ ພາຍໃນບ້ານດັ່ງກ່າວ ເພື່ອນຳໃຊ້ເຂົ້າໃນການຮຽນ. ຈາກນັ້ນ ຄະນະສືບຕໍ່ເດີນທາງໄປຢ້ຽມຢາມ ການຜະລິດກະສິກຳຂອງປະຊາຊົນ ຢູ່ ບ້ານຫ້ວຍຕອງ ຕື່ມອີກ.