ທ້າຍອາທິດຜ່ານມານີ້ ທີ່ວັດພູທາດ ໄຊມຸງຄຸນ ຣັດຕະນະມິ່ງເມືອງ, ເມືອງໄຊ, ແຂວງອຸດົມໄຊ ໄດ້ຈັດພິທີ ສະເຫລີມສະຫລອງ ອາຣາມວັດ ພ້ອມ ຈັດພິທີ ສູດພຸດທາ ພິເສກ ສົມໂພດ ຫລຽນ ພຣະປາງປະທານພອນ.
![](https://www.oudomxay.gov.la/site/wp-content/uploads/2023/06/IMG_9200.jpg)
![](https://www.oudomxay.gov.la/site/wp-content/uploads/2023/06/IMG_9178.jpg)
ພາຍຫລັງທີ່ສຳເລັດໃນການປັບປຸງ ບູລະນະ ປະຕິສັງຂອນ ພຣະປາງປະທານພອນ ແຫ່ງວັດພູທາດ ໄຊມຸງຄຸນ ຣັດຕະນະມິ່ງເມືອງ ໄດ້ມີຜູ້ທີ່ສົນໃຈ ໃນການເປັນເຈົ້າພາບ, ເຈົ້າສັດທາ ສ້າງວັດຖຸມຸງຄຸນ ຫລຽນ ພຣະເຈົ້າປາງປະທານພອນ ຂຶ້ນ ເຊິ່ງໄດ້ສົມທົບກັບເຈົ້າອະທິການວັດພູທາດ ໄຊມຸງຄຸນ ຣັດຕະນະມິ່ງເມືອງ ກໍຄື ອົງການພຸດທະສາສະຫນາ ສຳພັນລາວ ແຂວງອຸດົມໄຊ ລວມທັງ ບັນດາຂະແຫນງການກ່ຽວຂ້ອງແຕ່ລະຂັ້ນ ແລະ ສ້າງສຳເລັດ ທັງຫມົດ ປະກອບມີ: ພຣະບູຊາ ຂະຫນາດ 9 ນີ້ (40 ຊັງຕີແມັດ) ຈຳນວນ 69 ອົງ,ດອກຕະກຸດ ຈຳນວນ 39 ດອກ ແລະ ຫລຽນພຣະ ຈຳນວນ 7.041 ອົງ. ດັ່ງນັ້ນ ຈັດພິທີ ສູດພຸດທາພິເສກ ສົມໂພດ ຫຼຽນ ດັ່ງກ່າວນີ້ຂຶ້ນ ພ້ອມກັບ ການສະເຫລີມ ສະຫອລງ ອາຣາມ.ເພື່ອເຮັດໃຫ້ວັດຖຸມຸງຄຸນ ມີຄວາມສັກສິດ, ຖືກຕ້ອງ, ຄົບຖ້ວນ ຕາມຂັ້ນຕອນ.
![](https://www.oudomxay.gov.la/site/wp-content/uploads/2023/06/IMG_9054.jpg)
![](https://www.oudomxay.gov.la/site/wp-content/uploads/2023/06/IMG_9149.jpg)
ພາຍລັງ ສໍາເລັດ ພິທີ ສູດພຸດທາພິເສກ ສົມໂພດຫລຽນ ທາງເຈົ້າພາບ,ເຈົ້າສັດທາ ຜູ້ສ້າງວັດຖຸມຸງຄຸນ ຈະໄດ້ມອບ ຫຼຽນ ພຣະທຳມະທານ ໃຫ້ແກ່ວັດພູທາດ ໄຊມຸງຄຸນ ຣັດຕະນະມິ່ງເມືອງ ຈຳນວນ 2.000 ອົງ ເພື່ອແຈກຢາຍໃຫ້ຜູ້ທີ່ມີຈິດໃຈເຫລື້ອມໃສ,ສັດທາ ນຳໄປບູຊາ. ໃນພິທີ ກໍ່ໄດ້ມີການບວງສວງ ເຈົ້າພູມທິດທັງ 4, ໄຫວ້ພຣະ ຮັບສິນ-ສູດປະຣິຕະມຸງຄຸນ,ຖວາຍປັດໃຈ, ຄາຣະວະຮັບພອນ, ຢາດນ້ຳ ແລະ ອື່ນໆ ຕາມຫລັກການ,ຂັ້ນຕອນ ຂອງການສ້າງວັດຖຸມຸງຄຸນ.
ໃນໂອກາດ ຈັດພິທີ ສະເຫລີມ ສະຫລອງ ອາຣາມ ພ້ອມ ຈັດພິທີ ສູດພຸດທາພິເສກ ຫລຽນ ພຣະເຈົ້າປາງປະທານພອນ ຍັງມີການ ຕັກບາດ,ຢາດນ້ຳ,ໄຫວ້ພຣະຮັບສິນ,ຖວາຍເຄື່ອງໃສ່ບາດ,ພັດຕາຫານ,ກອງບວດ, ກອງອັດຖະ-ກອງຫົດ, ບ້າງກັນເທດ, ຟັງທໍາມະເທດສະຫນາ ແລະ ອື່ນໆ. ພິທີ ມີທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ,ທ່ານ ວັນນາ ແກ້ວສັນຕິ ປະທານອົງການແນວລາວສ້າງຊາດແຂວງ, ເຈົ້າພາບ-ເຈົ້າສັດທາ,ເຖົ້າແກ່ແນວໂຮມ, ພຣະສົງ, ສາມະເນນ ຕະຫລອດຮອດ ມວນຊົນຊາວ ແຂວງອຸດົມໄຊ ເຂົ້າຮ່ວມ.
ຂ່າວ: ຄານມະນີ ຮຽນດໍຈັນ