ພິທີ ປູກຕົ້ນໄມ້ແຫ່ງຊາດ 1 ມິຖຸນາ ຄົບຮອບ 44 ປີ ໄດ້ຈັດຂຶ້ນ ໃນຕອນເຊົ້າວັນທີ 31 ພຶດສະພາ 2024 ທີ່ສຸສານນັກຮົບປະຕິວັດ ແຂວງອຸດົມໄຊ ໂດຍການເຂົ້າຮ່ວມຂອງ ທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ, ທ່ານ ອ໋ອດ ພົງສະຫວັນ ຮອງປະທານສູນກາງແນວລາວສ້າງຊາດ ບໍ່ປະຈຳການ, ປະທານ ກຸ່ມບໍລິສັດ ພົງສະຫວັນ, ມີບັນດາການນຳແຂວງ, ການນຳເມືອງໄຊ, ຕາງຫນ້າພະແນກການຂັ້ນແຂວງ, ສອງກອງບັນຊາການ ປກຊ – ປກສ ເຂົ້າຮ່ວມ.
![](https://www.oudomxay.gov.la/wp-content/uploads/2024/06/446690067_395230376821576_1920559425463283791_n-1024x661.jpg)
![](https://www.oudomxay.gov.la/wp-content/uploads/2024/06/447194287_395230446821569_2662834099158257572_n-1024x694.jpg)
![](https://www.oudomxay.gov.la/wp-content/uploads/2024/06/447206846_395230280154919_6296323818160987906_n-1024x622.jpg)
ທ່ານ ພິມມະເສນ ຄູນສີລິວົງ ຮອງຫົວຫນ້າພະແນກ ກະສິກໍາ ແລະ ປ່າໄມ້ ກ່າວ ໃນວັນ ປູກຕົ້ນໄມ້ແຫ່ງຊາດ ວ່າ: ແຂວງອຸດົມໄຊ ໄດ້ຫ້າງຫາກະກຽມປູກຕົ້ນໄມ້ ເພື່ອຟື້ນຟູປ່າໄມ້ ແບບທຳມະຊາດ 2 ພັນກວ່າເຮັກຕາ ແລະ ປູກເອງ ຕາມຈຸດທີ່ກຳນົດ ປະມານ 200 ກວ່າເຮັກຕາ ແລະ ໄດ້ມີການກະກຽມ ເບ້ຍໄມ້ ຈຳນວນ 1 ລ້ານ 2 ແສນ 80 ພັນກວ່າເບ້ຍ ເພື່ອປູກໃນປີນີ້ ແລະ ປີຕໍ່ໆໄປ.
ສະເພາະພິທີ ປູກຕົ້ນໄມ້ ໃນວັນທີ 1 ມິຖຸນາ 2024 ນີ້ ທາງແຂວງອຸດົມໄຊ ໄດ້ກໍານົດ ການປູກທັງຫມົດ ຈໍານວນ 8 ຈຸດ ຄື: ຢູ່ບັນດາເມືອງ 7 ເມືອງ ແລະ ເທດສະບານແຂວງ ລວມເນື້ອທີ່ທັງຫມົດ 16 ກວ່າເຮັກຕາ ໃນນີ້ ປະກອບມີ: ໄມ້ປະດັບ ແລະ ໄມ້ອຸດສາຫະກຳ. ການຈັດກິດຈະກຳ ປູກຕົ້ນໄມ້ ໃນຄັ້ງນີ້ ກໍເພື່ອສ້າງຂະບວນການລິເລີ່ມ ແລະ ປູກຈິດສຳນຶກ ກ່ຽວກັບການປູກຕົ້ນໄມ້ ໃຫ້ແກ່ສັງຄົມ ແລະ ຄົນຮຸ່ນໃຫມ່ ຮັບຮູ້,ເຂົ້າໃຈ ຕໍ່ຄວາມສຳຄັນ ຂອງປ່າໄມ້ ຕໍ່ກັບຄົນເຮົາ, ເພື່ອປົກປັກຮັກສາສິ່ງແວດລ້ອມ, ລະບົບນິເວດ ແລະ ຄວາມອຸດົມສົມບູນຂອງທຳມະຊາດໃຫ້ມີຄວາມຍືນຍົງ, ເພື່ອເພີ່ມອັດຕາການປົກຫຸ້ມຂອງເນື້ອທີ່ປ່າໄມ້, ຫລຸດຜ່ອນມົນລະຜິດ ແລະ ເຮັດໃຫ້ທິວທັດທຳມະຊາດ ມີຄວາມສວຍສົດງົດງາມ.
![](https://www.oudomxay.gov.la/wp-content/uploads/2024/06/446997943_395230453488235_4071453247542301841_n-1024x609.jpg)
ໂອກາດດັ່ງກ່າວ ກໍໄດ້ມີການກ່າວເປີດພິທີ ພ້ອມທັງ ແນະນໍາ ຮູບແບບ, ວິທີການ, ຂັ້ນຕອນຕ່າງໆໃນການປູກ ໃນນີ້ ທາງຄະນະຮັບຜິດຊອບ ໄດ້ມີການກຳນົດຈຸດປູກໃຫ້ບັນດາການນຳ ຢ່າງລະອຽດ.