ວັນທີ 22 ມີນາ 2024 ທີ່ ສະໂມສອນ ຂອງແຂວງ ການນໍາພັກ-ລັດ, ສະມາຊິກພັກ, ພະນັກງານຫຼັກແຫຼ່ງອ້ອມຂ້າງແຂວງ ໄດ້ເຊື່ອມຊືມ ມູນເຊື້ອຂອງ ພັກປະຊາຊົນປະຕິວັດລາວ ຄົບຮອບ 69 ປີ ຄື: 22 ມີນາ 1955-22 ມີນາ 2024. ເປັນກຽດປາຖະກະຖາໂດຍ ສະຫາຍ ຄຳພຽງ ຢາຈົງວາ ຮອງເລຂາພັກແຂວງ, ຜູ້ຊີ້ນຳວຽກງານພັກ-ພະນັກງານ.
ການສະເຫຼີມ ສະຫຼອງ ວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 69 ປີ 2024
ໂອກາດດັ່ງກ່າວ ສະຫາຍຮອງເລຂາພັກແຂວງ ກໍໄດ້ຍົກໃຫ້ເຫັນ ມູນເຊື້ອການກຳເນີດເຕີບໃຫຍ່ຂະຫຍາຍຕົວ ແລະ ຜົນງານໄຊຊະນະການນຳພາຂອງພັກປະຊາຊົນປະຕິວັດລາວ ຕະຫຼອດໄລຍະ 69 ປີຜ່ານມາ, ຕິດພັນກັບຜົນງານການນຳພາຂອງອົງຄະນະພັກແຂວງ.
ພັກປະຊາຊົນ ປະຕິວັດລາວ ໄດ້ກຳເນີດເກີດຂຶ້ນ ໃນເງື່ອນໄຂທີ່ປະເທດເຮົາກໍຄື 3 ຊາດອິນດູຈີນ: ລາວ, ຫວຽດນາມ ແລະ ກໍາປູເຈຍ ຕົກເປັນຫົວເມືອງຂຶ້ນ ຂອງຈັກກະພັດລ່າເມືອງຂຶ້ນຝຣັ່ງ ແລະ ຖືກກົດຂີ່ຂູດຮີດຢ່າງໜັກໜ່ວງ, ຜ່ານບາດກ້າວຂະຫຍາຍຕົວຂອງການຕໍ່ສູ້ກູ້ຊາດ ແລະ ການເຕີບໃຫຍ່ຂະຫຍາຍຕົວຂອງການປະຕິວັດລາວ, ຫວຽດນາມ, ກໍາປູເຈຍ ມັນຮຽກຮ້ອງໃຫ້ມີການຈັດຕັ້ງນໍາພາອັນແທດເໝາະກັບຈຸດພິເສດຂອງແຕ່ປະເທດ ກອງປະຊຸມໃຫຍ່ ຄັ້ງທີ II ຂອງພັກກອມມູນິດອິນດູຈີນ (ເດືອນ ກຸມພາ 1951) ຈຶ່ງໄດ້ຕົກລົງໃຫ້ແຕ່ລະປະເທດສ້າງຕັ້ງພັກຂອງຕົນຂຶ້ນ ເພື່ອນໍາພາການປະຕິວັດຢູ່ປະເທດຂອງໃຜລາວ.
ວັນທີ 22 ມີນາ 1955 ສ້າງຕັ້ງພັກປະຊາຊົນລາວ ຢ່າງເປັນທາງການ ຈຸດປະສົງ ແມ່ນນໍາພາປວງຊົນລາວທັງຊາດ ດໍາເນີນພາລະກິດປ່ຽນແປງໃໝ່, ກໍ່ສ້າງ ແລະ ຂະຫຍາຍລະບອບ ປະຊາທິປະໄຕ ປະຊາຊົນ, ສ້າງປະຖົມປັດໄຈໃຫ້ແກ່ການກ້າວຂຶ້ນສັງຄົມນິຍົມເທື່ອລະກ້າວ, ພັກປະຊາຊົນປະຕິວັດລາວ ໄດ້ຖືເອົາຫຼັກມູນພື້ນຖານຂອງລັດທິ ມາກ-ເລນິນ ເປັນພື້ນຖານແຫ່ງແນວຄິດ ແລະ ທິດສະດີຂອງພັກ, ຖືຫຼັກການລວມສູນປະຊາທິປະໄຕຂອງພັກ, ນໍາພາເປັນໝູຄະນະ, ແບ່ງບຸກຄົນຮັບຜິດຊອບ ເປັນຫຼັກການຂອງພັກ, ຖືເອົາຄວາມສາມັກຄີອັນໜຶ່ງດຽວ, ເອົາການຕໍານິຕິຊົມເຊິ່ງງກັນ ແລະ ກັນ ເປັນກົດເກນ ຂອງການເຄື່ອນໄຫວ ແລະ ຖືເອົາມະຫາຊົນເປັນກໍາລັງແຮງໃນການນໍາພາ ຂອງພັກ.
ວັນທີ 22 ມີນາ – 6 ເມສາ 1955 ກອງປະຊຸມໄດ້ລົງມະຕິສ້າງຕັ້ງພັກຂອງຕົນຂຶ້ນ ໂດຍໃສ່ຊື່ວ່າ: ພັກປະຊາຊົນລາວ ເຊິ່ງປັດຈຸບັນແມ່ນພັກປະຊາຊົນປະຕິວັດລາວ ໂດຍໄດ້ເລືອກຕັ້ງ ປະທານ ໄກສອນ ພົມວິຫານ ເປັນເລຂາທິການໃຫຍ່ ຂອງພັກປະຊາຊົນລາວ ເພື່ອນໍາພາສືບທອດພາລະກິດອັນມີກຽດສະຫງ່າຂອງພັກ.
ທາດແທ້ຂອງ ພັກປະຊາຊົນປະຕິວັດລາວ ແມ່ນເປັນຕົວແທນທີ່ຈົງຮັກພັກດີຕໍ່ສິດຜົນປະໂຫຍດຂອງຊົນຊັ້ນກໍາມະກອນ, ຊາວຜູ້ອອກແຮງງານລາວທີ່ຮັກຊາດ ແລະ ຂອງຊາດລາວທັງໝົດ; ຍຶດໝັ້ນລັດທິ ມາກ – ເລນິນ, ແນວຄິດ ໄກສອນ ພົມວິຫານ ແລະ ມູນເຊື້ອອັນດີງາມຂອງພັກ ເປັນພື້ນຖານແນວຄິດ, ທິດສະດີຂອງພັກ.
ນັບແຕ່ມື້ສ້າງຕັ້ງຂຶ້ນ ພັກປະຊາຊົນປະຕິວັດລາວ ໄດ້ກໍານົດອຸດົມການຂອງຕົນຢ່າງຈະແຈ້ງ ຄື: ນໍາພາປວງຊົນລາວ ດໍາເນີນການຕໍ່ສູ້ຕ້ານພວກຈັກກະພັດລ່າເມືອງຂຶ້ນ ເພື່ອນໍາເອົາຄວາມເປັນເອກະລາດມາໃຫ້ແກ່ປະເທດຊາດ ແລະ ສິດເປັນເຈົ້າມາໃຫ້ປະຊາຊົນ, ສ້າງສາປະເທດຊາດສູ່ຈຸດໝາຍສັງຄົມນິຍົມ.
ສຳລັບຢູ່ ແຂວງອຸດົມໄຊ ໃນຕົ້ນປີ 1945 ສະຫາຍ ຄໍາແສງ ສີວິໄລ ເຊິ່ງເປັນສະມາຊິກພັກກອມມູນິດອິດູຈີນຄົນທຳອິດຂອງລາວ ພ້ອມດ້ວຍທະຫານອາສາສະໝັກ ຫວຽດນາມ ໄດ້ລົງມາເຄື່ອນໄຫວກໍ່ສ້າງຮາກຖານການເມືອງ ແລະ ສ້າງເຂດທີ່ໝັ້ນປະຕິວັດ ຢູ່ ແຂວງອຸດົມໄຊ ເພື່ອປຸກລະດົມຂົນຂວາຍປະຊາຊົນບັນດາເຜົ່າ ເຂົ້າຮ່ວມຂະບວນການປະຕິວັດ ເຊິ່ງສາມາດກໍ່ສ້າງ ພະນັກງານ ສະມາຊິກພັກ ທີ່ເປັນແກ່ນສານປະຕິວັດໄດ້ຈຳນວນໜຶ່ງ.
ມາຮອດປີ 1962 ສູນກາງພັກ ໄດ້ຕົກລົງສ້າງຕັ້ງແຂວງອຸດົມໄຊ ແລະ ໄດ້ບົງຕົວແຕ່ງຕັ້ງ ຄະນະພັກແຂວງ ຊຸດທຳອິດຂຶ້ນ ໂດຍແມ່ນ ສະຫາຍ ບຸນທັນ ວັນນະພົນ ເປັນເລຂາພັກແຂວງ ເພື່ອນໍາພາໃນການປະຕິບັດແນວທາງປ່ຽນແປງໃໝ່ຂອງພັກ. ພາຍໃຕ້ການ ນໍາພາ-ຊີ້ນໍາ ຂອງອົງຄະນະພັກແຕ່ລະສະໄໝ ນັບແຕ່ ສະໄໝທີ I ຈົນຮອດ ສະໄໝທີ IX ແຂວງອຸດົມໄຊ ໄດ້ຮັບການພັດທະນາເປັນກ້າວໆມາ ສິ່ງສໍາຄັນ ແຂວງອຸດົມໄຊ ຍັງຮັກສາໄດ້ ສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບເປັນລະບຽບຮຽບຮ້ອຍໂດຍພື້ນຖານ, ເສດຖະກິດ-ສັງຄົມ ມີການຂະຫຍາຍຕົວ, ຊີວິດການເປັນຢູ່ຂອງປະຊາຊົນນັບມື້ໄດ້ຮັບການປັບປຸງດີຂຶ້ນເທື່ອລະກ້າວ.
ມາຮອດປະຈຸບັນ ເສດຖະກິດຂອງແຂວງ ມີການຂະຫຍາຍຕົວໃນລະດັບ 4,65%, ມູນຄ່າຜະລິດຕະພັນພາຍໃນ GDP ບັນລຸໄດ້ 8.592,99 ຕື້ກີບ, ສະເລ່ຍລາຍຮັບຕໍ່ຫົວຄົນ ເທົ່າກັບ 1.284 ໂດລາສະຫະລັດ/ຄົນ/ປີ ໃນນີ້: ຂະແໜງກະສິກຳ ຂະຫຍາຍຕົວ 8,46%, ຂະແໜງອຸດສາຫະກຳຂະຫຍາຍຕົວ 4,06%, ຂະແໜງບໍລິການຂະຫຍາຍຕົວ 2,36%, ພາສີອາກອນຜະລິດຕະພັນ ແລະ ຂາເຂົ້າຂະຫຍາຍຕົວ 1,78%. ໂຄງລ່າງພື້ນຖານ ເຊັ່ນ: ຖະໜົນຫົນທາງໃນຕົວເມືອງ ແລະ ຊົນນະບົດ, ເຮືອນຊານບ້ານຊ່ອງ, ສໍານັກງານ-ອົງການ, ໂຮງຮຽນ, ໂຮງໝໍ, ຕະຫຼາດ, ສະຖານທີ່ບໍລິການໂຮງແຮມ, ເຮືອນພັກ, ຮ້ານອາຫານ ແລະ ສະຖານທີ່ທ່ອງທ່ຽວ ໄດ້ຮັບການປັບປຸງ, ກໍ່ສ້າງພັດທະນາມີການຂະຫຍາຍຕົວເປັນກ້າວໆມາ. ທີ່ພົ້ນເດັ່ນ ມີເສັ້ນທາງລົດໄຟ ລາວ-ຈີນ ຜ່ານ 3 ເມືອງ, ມີ 3 ສະຖານນີ; ທົ່ວແຂວງມີເສັ້ນທາງເຂົ້າເຖິງ 464 ບ້ານ; ອັດຕາການຊົມໃຊ້ໄຟຟ້າ ທັງໝົດ 444 ບ້ານ; ສັນຍານໂທລະສັບເຂົ້າເຖິງ 447 ບ້ານ. ຂະແໜງການສຶກສາໄດ້ຮັບການປັບປຸງຄຸນນະພາບໃນທຸກລະດັບ, ພ້ອມທັງສ້າງເງື່ອນໄຂການເຂົ້າເຖິງການສຶກສາ; ຂະແໜງສາທາລະນະສຸກ ໄດ້ປັບປຸງການບໍລິການສາທາລະນະສຸກ ແລະໂພສະນາການຢ່າງທົ່ວເຖິງ ແລະ ມີຄຸນນະພາບນັບມື້ສູງຂຶ້ນ.
ໂອກາດດຽວກັນ ຍັງໄດ້ມອບໃບຢັ້ງຢືນໜ່ວຍພັກປອດໄສ,ເຂັ້ມແຂງ,ໜັກແໜ້ນ ໃຫ້ທົ່ວອົງຄະນະພັກແຂວງ ປະຈຳປີ 2023 ລວມຈຳນວນ 698 ໜ່ວຍພັກ, ມອບໃບຍ້ອງຍໍ ແລະ ຊົມເຊີຍ ໃຫ້ແກ່ ພະນັກງານ-ລັດຖະກອນຂັ້ນແຂວງ, ເມືອງ, ທະການ-ຕຳຫຼວດ, ພະນັກງານລັດວິສາຫະກິດ ແລະ ທະນາຄານ ທີ່ມີຜົນງານດີເດັ່ນ ປະຈຳປີ 2023 ໃນນັ້ນ ໃບຍ້ອງຍໍ ຈຳນວນ 3,256 ໃບ ແລະ ໃບຊົມເຊີຍ ຈຳນວນ 2,821 ໃບ ແລະ ມອບໃບຍ້ອງໃຫ້ແກ່ບຸກຄົນ, ກົມກອງລວມໝູ່, ພາກທຸລະກິດ, ຜູ້ປະກອບການ ທັງພາຍໃນ ແລະ ຕ່າງປະເທດ ທີ່ມີຜົນງານດີເດັ່ນໃນການປະກອບສ່ວນດ້ານວັດຖຸແລະເງິນສົດເຂົ້າໃນການ ຈັດງານບຸນປະເພນີບັນດາເຜົ່າ ເພື່ອສົ່ງເສີມການທ່ອງທ່ຽວຂອງແຂວງ ໃນນັ້ນ ມີໃບຍ້ອງຍໍ ຈຳນວນ 58 ໃບ ແລະ ໃບຊົມເຊີຍ ຈຳນວນ 86ໃບ. ເປັນກຽດມອບໂດຍແມ່ນ ສະຫາຍ ຄຳພຽງ ຢາຈົງວາ ຮອງເລຂາພັກແຂວງ ຜູ້ຊີ້ນຳວຽກງານພັກ-ພະນັກງານ, ສະຫາຍ ຄຳດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ ແລະ ສະຫາຍ ອ່ອນແກ້ວ ອຸ່ນອາລົມ ຮອງເຈົ້າແຂວງ
