ຂ່າວ ຫ້ອງວ່າການແຂວງ

ໃນວັນທີ 22 ມັງກອນ 2026, ທີ່ຫ້ອງປະຊຸມຫ້ອງວ່າການປົກຄອງແຂວງ, ໄດ້ຈັດກອງປະຊຸມເຊື່ອມຊຶມເອກະສານສຳຄັນຂອງພັກ, ກົດໝາຍຂອງລັດ ແລະ ເອກະສານມູນເຊື້ອວັນສຳຄັນຕ່າງໆຂອງຊາດ. ກອງປະຊຸມຄັ້ງນີ້ ໃຫ້ກຽດເປັນປະທານໂດຍ ທ່ານ ພິໄລທອງ ຈິດມະນີ, ກຳມະການສຳຮອງສູນກາງພັກ, ຫົວໜ້າຫ້ອງວ່າການແຂວງ; ມີບັນດາຄະນະຫ້ອງວ່າການ, ພະແນກການ, ພ້ອມດ້ວຍພະນັກງານ-ລັດຖະກອນພາຍໃນຫ້ອງວ່າການເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສ້າງຄວາມຮັບຮູ້ ແລະ ຄວາມເຂົ້າໃຈຢ່າງເລິກເຊິ່ງໃຫ້ແກ່ສະມາຊິກພັກ, ພະນັກງານ-ລັດຖະກອນ ຕໍ່ກັບແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ໂດຍສະເພາະແມ່ນການຫັນເອົາເນື້ອໃນຈິດໃຈຂອງສູນກາງ ລົງສູ່ການຈັດຕັ້ງປະຕິບັດຕົວຈິງຢູ່ທ້ອງຖິ່ນໃຫ້ມີປະສິດທິຜົນ.

ໃນກອງປະຊຸມ, ທ່ານປະທານໄດ້ໃຫ້ກຽດເຜີຍແຜ່ ແລະ ເຊື່ອມຊຶມບັນດາເອກະສານທີ່ສຳຄັນ ດັ່ງນີ້:

ມະຕິກົມການເມືອງສູນກາງພັກ ສະບັບເລກທີ 26/ກມສພ (ລົງວັນທີ 12 ກັນຍາ 2025): ວ່າດ້ວຍການນໍາພາ-ຊີ້ນໍາ ຂອງຄະນະພັກທຸກຂັ້ນ ຕໍ່ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ V ທີ່ຈະມາເຖິງນີ້. ເຊິ່ງເນັ້ນໜັກໃຫ້ຄະນະພັກທຸກຂັ້ນຖືເອົາວຽກງານການເລືອກຕັ້ງເປັນບັ້ນການເມືອງທີ່ສຳຄັນທີ່ສຸດ ເພື່ອສ້າງຄວາມເຂັ້ມແຂງໃຫ້ແກ່ອຳນາດການປົກຄອງລັດ.

ການເພີ່ມທະວີການນໍາພາແນວຄິດ ແລະ ເສີມຂະຫຍາຍສິດປະຊາທິປະໄຕ: ເພື່ອປຸກລະດົມໃຫ້ພະນັກງານ ແລະ ປະຊາຊົນມີສະຕິຕື່ນຕົວໃນການໄປໃຊ້ສິດເລືອກຕັ້ງຢ່າງເປັນຂະບວນຟົດຟື້ນ ແລະ ເລືອກໄດ້ບຸກຄະລາກອນທີ່ມີມາດຕະຖານ, ເງື່ອນໄຂຄົບຖ້ວນ ເຂົ້າໃນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ.

ກົດໝາຍວ່າດ້ວຍການເລືອກຕັ້ງ ສສຊ ແລະ ສສຂ: ເພື່ອໃຫ້ຜູ້ເຂົ້າຮ່ວມໄດ້ກຳແໜ້ນຫຼັກການ, ຂັ້ນຕອນ ແລະ ລະບຽບການຕ່າງໆ ໃນການປ່ອນບັດເລືອກຕັ້ງໃຫ້ຖືກຕ້ອງຕາມກົດໝາຍ.

ແຜນດໍາເນີນງານຂອງຄະນະກຳມະການເລືອກຕັ້ງຂັ້ນແຂວງ (ສະບັບເລກທີ 011/ຄລຂ): ເພື່ອຜັນຂະຫຍາຍແຜນວຽກລະອຽດ, ການແບ່ງຄວາມຮັບຜິດຊອບ ແລະ ກຳນົດເວລາໃນການກຽມຄວາມພ້ອມດ້ານຕ່າງໆ ພາຍໃນແຂວງໃຫ້ມີຄວາມເປັນເອກະພາບ.

ນອກຈາກວຽກງານການເລືອກຕັ້ງແລ້ວ, ກອງປະຊຸມຍັງໄດ້ຫວນຄືນມູນເຊື້ອປະຫວັດສາດທີ່ສຳຄັນ ເພື່ອສຶກສາອົບຮົມດ້ານການເມືອງ-ແນວຄິດ ເປັນຕົ້ນແມ່ນ:

ວັນສ້າງຕັ້ງກອງທັບປະຊາຊົນລາວ ຄົບຮອບ 77 ປີ: ເພື່ອຈົດຈຳບຸນຄຸນ ແລະ ຜົນງານອັນລ້ຳຄ່າຂອງກອງທັບ ທີ່ໄດ້ເສຍສະຫຼະເລືອດເນື້ອເພື່ອເອກະລາດ ແລະ ຄວາມເປັນເອກະລາດຂອງຊາດ.

ວັນສ້າງຕັ້ງສະຫະພັນກຳມະບານລາວ ຄົບຮອບ 70 ປີ: ເພື່ອຍົກສູງບົດບາດຂອງຊົນຊັ້ນກຳມະກອນ ແລະ ຜູ້ອອກແຮງງານລາວ ໃນການປົກປັກຮັກສາ ແລະ ສ້າງສາພັດທະນາປະເທດຊາດ.

ໃນຕອນທ້າຍຂອງກອງປະຊຸມ, ທ່ານ ພິໄລທອງ ຈິດມະນີ ໄດ້ມີຄຳເຫັນຊີ້ນຳ ແລະ ສັງລວມເນື້ອໃນສຳຄັນ ໂດຍທ່ານໄດ້ເນັ້ນໜັກໃຫ້ພະນັກງານທຸກສະຫາຍ ຈົ່ງຍົກສູງຄວາມຮັບຜິດຊອບຕໍ່ໜ້າທີ່ການເມືອງ, ເອົາໃຈໃສ່ໂຄສະນາເຜີຍແຜ່ຂໍ້ມູນຂ່າວສານການເລືອກຕັ້ງໃຫ້ກວ້າງຂວາງ ແລະ ກຽມພ້ອມທຸກດ້ານເພື່ອເຮັດໃຫ້ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ທີ່ກຳລັງຈະມາເຖິງນີ້ ດຳເນີນໄປດ້ວຍຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ໄດ້ຮັບຜົນສຳເລັດຕາມຄາດໝາຍທີ່ວາງໄວ້.

ກອງປະຊຸມໃຫຍ່ ສະມາຊິກພັກ, ໜ່ວຍພັກຮາກຖານ ຫ້ອງວ່າການ ແຂວງອຸດົມໄຊ ຄັ້ງທີ IV ໄດ້ຈັດຂຶ້ນ ທີ່ ຫ້ອງປະຊຸມຂອງຕົນ ໃນວັນທີ 14 ພະຈິກ 2025  ພາຍໃຕ້ຄຳຂວັນ 3 ດີ 4 ໃຫ້ ໂດຍການເປັນປະທານຂອງ ສະຫາຍ ພິໄລທອງ ຈິດມະນີ ກຳມະການພັກແຂວງ, ເລຂາໜ່ວຍພັກຮາກຖານ ຫ້ອງວ່າການແຂວງ. ໃຫ້ກຽດເຂົ້າຮ່ວມໂດຍ ສະຫາຍ ປອ ວົງສະຫວັນ ໄຊຍະວົງ ຮອງເລຂາພັກແຂວງ, ປະທານຄະນະກຳມະການປົກຄອງແຂວງ, ມີຄະນະພັກ, ຄະນະຮັບຜິດຊອບຂັ້ນແຂວງ, ພ້ອມດ້ວຍ ສະມາຊິກພັກ ແລະ ແຂກເຊີນ ເຂົ້າຮ່ວມ.