ຄະນະຜູ້ແທນຂັ້ນສູງ ແຂວງອຸດົມໄຊ ພົບປະ ແລະ ແລກປ່ຽນບົດຮຽນ ນຳ ຄະນະຜູ້ແທນຂັ້ນສູງ ແຂວງເຊີນລາ

ຕອນເຊົ້າຂອງວັນທີ 11 ຕຸລາ 2025 ທີ່ຫ້ອງປະຊຸມຄະນະກຳມະການປະຊາຊົນ ແຂວງເຊີນລາ ຄະນະຜູ້ແທນຂັ້ນສູງ ແຂວງອຸດົມໄຊ ແຫ່ງ ສປປ ລາວ ແລະ ຄະນະຜູ້ແທນຂັ້ນສູງ ແຂວງເຊີນລາ ແຫ່ງ ສສ ຫວຽດນາມ ໄດ້ພົບປະ ແລະ ແລກປ່ຽນບົດຮຽນ ປະຊົບການນຳກັນ ກ່ຽວກັບວຽກງານແບ່ງຄວາມຮັບຜິດຊອບ ລະຫວ່າງ ເລຂາພັກ ແລະ ປະທານຄະນະກຳມະການປົກຄອງຂັ້ນແຂວງ, ເມືອງ ແລະ ຂັ້ນຕາແສງ, ການກໍານົດແບບແຜນການນຳພາ ແລະ ວິທີເຮັດວຽກ ຂອງ ຄະນະປະຈຳພັກແຂວງ ພາຍໃຕ້ການນຳພາ ຂອງ ເລຂາພັກແຂວງ, ຮັບປະກັນລັກສະນະຊີ້ນຳວຽກງານຮອບດ້ານຂອງພັກ ແລະ ວຽກງານອົງການປົກຄອງແຂວງ ແລະ ເມືອງ, ຮຸບແບບການ ຊີ້ນຳ, ຕິດຕາມ, ກວດກາ, ຊ່ອງແສງ, ລາຍງານ, ການເຮັດໜ້າທີ່ເປັນເສນາທິການ ແລະ ກົນໄກປະສານງານ ລະຫວ່າງ ຫ້ອງວ່າການພັກ, ຫ້ອງວ່າການລັດ, ຫ້ອງວ່າການສະພາ, ບົດຮຽນໃນການແບ່ງຂັ້ນຄຸ້ມຄອງ ລະຫວ່າງ ຂັ້ນເມືອງ ກັບ ຂັ້ຕາແສງ, ບົດຮຽນໃນການຈັດຕັ້ງປະຕິບັດ ວຽກງານ ສູນບໍລິການ ຜ່ານປະຕູດຽວພາກລັດ ແລະ ຮ່ວມງານສະເຫລີມສະຫລອງ ວັນສ້າງຕັ້ງ ແຂວງເຊີນລາ ຄົບຮອບ 130 ປີ.

ໂອກາດການ ພົບປະ ແລະ ແລກປ່ຽນບົດຮຽນ ທີ່ເຕັມໄປດ້ວຍໄມຕຣີຈິດມິດຕະພາບ ບັນຍາມກາດອັນອົນອຸ່ນ ແລະ ສະນິດສະໜົມ ສະຫາຍ ປອ ວົງສະຫວັນ ໄຊຍະວົງ ຮອງເລຂາພັກແຂວງ, ປະທານຄະນະກຳມະການປົກຄອງແຂວງອຸດົມໄຊ ຕາງໜ້າຄະນະຜູ້ແທນຂັ້ນສູງແຂວງອຸດົມໄຊ ແລະ ສະຫາຍ ຫງວຽນດີ້ງຫວຽດ ຮອງເລຂາພັກແຂວງ, ປະທານຄະນະກຳມະການປະຊາຊົນ ແຂວງເຊີນລາ ຕາງໜ້າຄະນະຜູ້ແທນຂັ້ນສູງ ແຂວງເຊີນລາ ທັງສອງໄດ້ຜັດປ່ຽນກັນລາຍງານສະພາບການພັດທະນາ ເສດຖະກິດ-ສັງຄົມ ຂອງແຂວງ ໃຫ້ກັນຊາບ, ພ້ອມຕີລາຄາການພົວພັນຮ່ວມມືຮອບດ້ານຂອງສອງແຂວງ ໄລຍະຜ່ານມາ, ມີຫລາຍດ້ານທີ່ສາມາດຍາດໄດ້ເປັນຜົນງານຂອງສອງແຂວງ ແລະ ສະຫາຍ ປອ ວົງສະຫວັນ ໄຊຍະວົງ ຮອງເລຂາພັກແຂວງ, ປະທານຄະນະກຳມະການປົກຄອງແຂວງອຸດົມໄຊ ຍັງໄດ້ຖືໂອກາດເຊື້ອເຊີນ ຄະນະຜູ້ແທນຂັ້ນສູງ ແຂວງເຊີນລາ ໄປຢ້ຽມຢາມ ແລະ ເຮັດວຽກ ຢູ່ ແຂວງອຸດົມໄຊ ຕາມເວລາທີ່ເໝາະສົມ, ອວຍພອນໃຫ້ສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຂອງສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ແຂວງອຸດົມໄຊ ແລະ ແຂວງເຊີນລາ ຈົ່ງຂຽວສົດງົດງາມ ໝັ້ນຄົງທະນົງແກ່ນ ຕະຫລອດກາລະນານ. ຕອນບ່າຍ ຄະນະຜູ້ແທນຂັ້ນສູງ ແຂວງອຸດົມໄຊ ຍັງສືບຕໍ່ເດີນທາງໄປ ຢ້ຽມຢາມ ແລະ ຖອດຖອນບົດຮຽນ ຢູ່ ແຂວງລາຍເຈົ່າ ຕື່ມອີກ.

 

ຂ່າວ: ສະຖານີວິທະຍຸ ແລະ ໂທລະພາບ ແຂວງອຸດົມໄຊ