ພິທີ ປາຖະກະຖາ ມູນເຊື້ອວັນສ້າງຕັ້ງພັກ ຄົບຮອບ 66 ປີ ( 22 ມີນາ 1955 – 22 ມີນາ 2021 ) ແລະ ວັນຄຽດແຄ້ນ ຂອງປະຊາຊົນລາວ – ວັນນັກຮົບເສຍອົງຄະ ແລະ ເສຍສະຫລະຊີວິດ ເພື່ອປະເທດຊາດ ຄົບຮອບ 75 ປີ ( 21 ມີນາ 1946 – 21 ມີນາ 2021 ) ຈັດຂຶ້ນໃນຕອນເຊົ້າວັນທີ 22 ມີນາ 2021 ທີ່ສະໂມສອນແຂວງ. ໃຫ້ກຽດປາຖະກະຖາ ໂດຍ ທ່ານ ຄຳພຽງ ຢາຈົງວາ ຮອງເລຂາພັກແຂວງ.

        ການຈັດພິທີ ປາຖະກະຖາ ຄັ້ງນີ້ ກໍເພື່ອຫວນຄືນມູນເຊື້ອ ວັນສຳຄັນຂອງຊາດ, ຂອງພັກ ກໍຄື 2 ວັນດັ່ງກ່າວ ໂດຍແນ່ໃສ່ເຮັດໃຫ້ພະນັກງານ ລັດຖະກອນ ແຕ່ລະຂະແຫນງການ ພາຍໃນເທດສະບານແຂວງອຸດົມໄຊ ຮັບຮູ້, ເຂົ້າໃຈ ຕໍ່ກັບຕົ້ນກຳເນີດ ແລະ ຄວາມຫມາຍ ສຳຄັນຂອງພັກປະຊາຊົນປະຕິວັດລາວ, ໂຄງການ ການເມືອງທຳອິດຂອງພັກ, ການຊີ້ນຳ-ນຳພາ ຂອງພັກ ໃນຕະຫຼອດໄລຍະ 66 ປີຜ່ານມາ ໂດຍສະເພາະແມ່ນ ໄລຍະ ປີ 1955 – 1975 ເຊິ່ງເປັນໄລຍະນຳພາການປະຕິວັດຊາດ – ປະຊາທິປະໄຕເຕີບໃຫຍ່ ແລະ ມີໄຊ,ໄລຍະ ປີ 1975 – 1985 ແມ່ນໄລຍະນຳພາປົກປັກຮັກສາລະບອບໃຫມ່ ແລະ ສ້າງພື້ນຖານ ເສດຖະກິດ – ສັງຄົມ, ໄລຍະ ປີ 1986 – 2021 ເປັນໄລຍະນຳພາປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງປ່ຽນແປງໃຫມ່ ລວມທັງການເສີມຂະຫຍາຍມູນເຊື້ອທາດແທ້ຂອງພັກ ຮັບຮູ້, ເຂົ້າໃຈ ເຖິງປະຫວັດຄວາມເປັນມາຂອງວັນຄຽດແຄ້ນຂອງປະຊາຊົນລາວ – ວັນນັກຮົບເສຍອົງຄະ ແລະ ເສຍສະຫລະຊີວິດ ເພື່ອປະເທດຊາດ, ຂະບວນການຕໍ່ສູ້ຂອງປະຊາຊົນລາວບັນດາເຜົ່າ ຕ້ານການຮຸກຮານຂອງພວກລ່າເມືອງຂຶ້ນຝຣັ່ງ ໂດຍສະເພາະແມ່ນຢູ່ເມືອງທ່າແຂກ ແຂວງຄຳມ່ວນ ລວມທັງຄວາມຫມາຍ, ຄວາມສຳຄັນຂອງບັ້ນຮົບ ປ້ອງກັນຕົວເມືອງທ່າແຂກ. ຕໍ່ກັບວັນດັ່ງກ່າວນີ້ ຖືວ່າເປັນວັນສຳຄັນທາງປະຫວັດສາດຂອງຊາດເຮົາ ແລະ ເປັນວັນທີ່ພວກຈັກກະພັກລ່າເມືອງຂຶ້ນຝຣັ່ງ ໄດ້ສ້າງຄວາມເຈັບແສບໃຫ້ແກ່ປະຊາຊົນລາວ ໂດຍສະເພາະທີ່ເມືອງທ່າແຂກ ຕະຫຼອດຮອດພະນັກງານນັກຮົບພວກເຮົາ ດັ່ງນັ້ນ ການນຳພັກ – ລັດ ຈຶ່ງໄດ້ ກຳນົດເອົາວັນທີ 21 ມີນາ 1946 ເປັນວັນຄຽດແຄ້ນສັດຕູຜູ້ຮຸກຮານ ແລະ ໄດ້ມີການລະນຶກເຖິງວັນດັ່ງກ່າວໃນແຕ່ລະປີ ຈາກນັ້ນ ປີ 2014 ຫ້ອງວ່າ ການສູນກາງພັກ ໄດ້ອອກແຈ້ງກ່ຽວກັບການຈັດຕັ້ງລະນຶກ ວັນນັກຮົບເສຍອົງຄະ ແລະ ເສຍສະຫລະຊີວິດ ເພື່ອປະເທດຊາດ ແລະ ພ້ອມກັນຈັດຕັ້ງປະຕິບັດນັບແຕ່ນັ້ນເປັນຕົ້ນມາ. ນອກຈາກການປາຖະກະຖາ 2 ວັນດັ່ງກ່າວແລ້ວ ໃນພິທີ ຍັງໄດ້ຮັບຟັງບາງເນື້ອໃນເອກກະສານທີ່ສຳຄັນ ໂດຍສະເພາະແມ່ນ ຜົນງານການເຄື່ອນໄຫວ ນຳພາ – ຊີ້ນໍາ ຂອງອົງຄະນະພັກແຂວງອຸດົມໄຊ ໃນໄລຍະ 1 ປີຜ່ານມາຕື່ມອີກ.

ເຂົ້າຮ່ວມຮັບຟັງ ມີການນຳ, ອາດີດການນຳ, ສອງກອງບັນຊາການ ປກຊ – ປກສ ຕະຫຼອດຮອດພະນັກງານ ລັດຖະກອນ ທີ່ຕາງຫນ້າຂະແຫນງການ ທົ່ວເທດສະບານແຂວງອຸດົມໄຊ.