ກອງປະຊຸມໃຫຍ່ຜູ້ແທນອົງຄະນະພັກເມືອງງາຄັ້ງທີ XI ພາຍຫຼັງດຳເນີນເປັນເວລາສອງວັນ ມາໃນຕອນບ່າຍວັນທີ 13 ທັນວາ 2019 ກໍໄດ້ອັດລົງດ້ວຍຜົນສຳເລັດ ຢູ່ທີ່ສະໂມສອນຂອງເມືອງ ໂດຍພາຍໃຕ້ການເປັນປະທານ ຂອງສະຫາຍ ຄໍາແສງ ຢາງຈະກິ ກໍາມະການພັກແຂວງ ເລຂາພັກເມືອງ ເຈົ້າເມືອງໆງາ. ເປັນກຽດເຂົ້າຮ່ວມມີສະຫາຍ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ. ມີ ບັນດາສະຫາຍກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ເລຂາ-ຮອງເລຂາພັກເມືອງພາຍໃນແຂວງ, ຄະນະພັກ,ຄະນະບັນຊາກອງພົນທະຫານຮາບທີ 3, ອາດີດການນໍາຂອງເມືອງ, ພະນັກງານປະຕິວັດອາວຸໂສ ແລະ ຜູ້ແທນສົມບູນ ທີ່ມາຈາກຄະນະພັກຮາກຖານ ແລະໜ່ວຍພັກທົ່ວເມືອງເຂົ້າຮ່ວມຈຳນວນ 121 ສະຫາຍ, ຍີງ 11 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວເມືອງທັງໝົດ 1.479 ສະຫາຍ, ຍິງ 320 ສະຫາຍ.ກອງປະຊຸມບັນດາຜູ້ແທນເຂົ້າຮ່ວມ ລ້ວນແຕ່ໄດ້ຍົກສູງຄວາມຮັບຜິດຊອບ, ສຸມສະຕິປັນຍາຂອງຕົນເຂົ້າໃນການຄົ້ນຄວ້າປະກອບຄໍາເຫັນຕໍ່ເນື້ອໃນກອງປະຊຸມ ຢ່າງກົງໄປກົງມາ, ເຊິ່ງໄດ້ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ປະສົບຜົນສຳເລັດຢ່າງສະຫງ່າງາມຕາມຈຸດປະສົງ ແລະ ລະດັບຄາດ ໝາຍທີ່ໄດ້ກຳນົດໄວ້. ກອງປະຊຸມໄດ້ພ້ອມກັນຄົ້ນຄ້ວາ ແລະ ປະກອບຄໍາເຫັນ ພ້ອມທັງໄດ້ຮັບຮອງເອົາຮ່າງລາຍງານການເມືອງແຜນພັດທະນາເສດຖະກິດ-ສັງຄົມ; ທິດທາງ, ຄາດໝາຍສູ້ຊົນ ກ່ຽວກັບວຽກງານກໍ່ສ້າງພັກ, ພະນັກງານ ແລະ ບົດສໍຳຫຼວດການນໍາພາລວມຂອງຄະນະພັກຊຸດທີ X , ທິດທາງແຜນການ 5 ປີ ນັບແຕ່ປີ 2020-2024. ໂດຍ ສືບຕໍ່ເຮັດໃຫ້ເມືອງງາ ມີສະຖຽນລະພາບ ທາງດ້ານການເມືອງຢ່າງໜັກແໜ້ນ, ປັບປຸງບູລະນະລະບອບປະຊາທິປະໄຕປະຊາຊົນ ໃຫ້ມີຄວາມເຂັ້ມແຂງ, ເພີ່ມທະວີຄວາມສາມັກຄີເປັນເອກະພາບ; ເປັນປຶກແຜ່ນຂອງປະຊາຊົນບັນດາເຜົ່າ, ສັງຄົມມີຄວາມເປັນລະບຽບຮຽບຮ້ອຍ ແລະ ມີຄວາມສະຫງົບໂດຍພື້ນຖານ, ເສດຖະກິດ ຂະຫຍາຍຕົວໃນລະດັບ 7% ລວມຍອດມູນຄ່າລາຍຮັບພາຍໃນໃຫ້ບັນລຸ 346ກວ່າຕຶ້ກີບ ໃນປີ 2024 ສະເລ່ຍຕໍ່ຫົວຄົນໃຫ້ບັນລຸ 9 ລ້ານ ກວ່າກີບ ຫຼື ເທົ່າກັບ 1.176 ໂດລາ/ຄົນ/ປີ, ສູ້ຊົນເຮັດໃຫ້ການຂາດດູ່ນງົບປະມານຫຼຸດລົງເທື່ອລະກ້າວ, ສູ້ຊົນຜະລິດສະບຽງອາຫານ ແລະ ຜະລິດເປັນສິນຄ້າຕິດພັນກັບການປຸງແຕ່ງໃຫ້ສາມາດສະໜອງຢ່າງພຽງພໍ, ການພັດທະນາເສດຖະກິດ-ສັງຄົມຕ້ອງຕິດພັນກັບການພັດທະນາສິ່ງແວດລ້ອມແບບຢືນຍົງ, ສ້າງ, ປັບປຸງ ແລະຍົກລະດັບເສັ້ນທາງແຕ່ລະເສັ້ນຮັບປະກັນໃຫ້ເສັ້ນທາງສາມາດທຽວໄດ້ສອງລະດູ, ປູຢາງເທດສະບານເມືອງງາຫາແຂວງໃຫ້ສຳເລັດ, ສູ້ຊົນສ້າງເສັ້ນທາງເຊື່ອມຕໍ່ເມືອງງາ ຫາຫຼວງພະບາງ, ເມືອງງາ ຫາ ເມືອງຫົງສາ ແຂວງໄຊຍະບູລີ. ຫຼຸດອັດຕາຄວາມທຸກຍາກໃຫ້ແກ່ປະຊາຊົນຮອດປີ 2024 ໃຫ້ໄດ້ໂດຍພື້ນຖານ, ເຮັດໃຫ້ອັດຕາເຂົ້າຮຽນຊັ້ນປະຖົມໃຫ້ບັນລຸ 99%, ພົນລະເມືອງເກນອາຍຸ 15-40 ປີ ຕ້ອງຈົບຊັ້ນມັດທະຍົມຕົ້ນ 98%, ສືບຕໍ່ຍົກສູງຄຸນນະພາບການກວດ, ປິ່ນປົວສຸຂະພາບ ແລະການໃຫ້ການບໍລິການຕ່າງໆ, ເພີ່ມທະວີການເຮັດວຽກໂຄສະນາສຸຂະສຶກສາອານາໄມ, ອອກບັດປະກັນສັງຄົມ, ສູ້ຊົນສ້າງຊັບພະຍາກອນມະນຸດຕາມທ່າແຮງ ແລະ ເງື່ອນໄຂຂອງເມືອງ, ປຸກລະດົມຊຸກຍູ້ໃຫ້ປະຊາຊົນທົ່ວເມືອງເຂົ້າເຖິງການບໍລິການດ້ານສາທາລະນະສຸກໃຫ້ໄດ້ 90% ແລະ ຮັບປະກັນອາຍຸຢືນສະເລ່ຍ 65 ປີ, ສືບຕໍ່ສົ່ງເສີມໃນການຮັກສາຮີດຄອງປະເພນີ, ວັດທະນະທຳອັນດີງາມຂອງບັນດາເຜົ່າດ້ວຍວິທີການຈັດງານບຸນປະເພນີຕິດພັນກັບການທ່ອງທ່ຽວ, ສ້າງເງື່ອນໄຂໃຫ້ມີການຮ່ວມມືກັບສາກົນຢ່າງກວ້າງຂວາງ; ລະດົມ ແລະດຶງດູດການລົງທຶນພາຍໃນ ແລະຕ່າງປະເທດເຂົ້າໃນການພັດທະນາເສດຖະກິດ-ສັງຄົມຂອງເມືອງ, ເພີ່ມທະວີບົດບາດການນຳພາຂອງພັກ, ສ້າງໜ່ວຍພັກປອດໃສ, ເຂັ້ມແຂງ ແລະໜັກແໜ້ນ ໃຫ້ໄດ້ 70% ຂຶ້ນໄປແລະຈັດຕັ້ງປະຕິບັດເນື້ອໃນ 4ໃຈກາງຂອງແຂວງໃຫ້ປະກົດຜົນເປັນຈິງ. ກອງປະຊຸມໄດ້ຮັບຟັງການລາຍງານ ແລະ ການປະກອບຄໍາຄິດຄໍາເຫັນຂອງບັນດາຕົວແທນຈາກຂະ ແໜ່ງການ, ຄອບຄົວຕົວແບບການຜະລິດ ແລະ ບັນດາເມືອງພາຍໃນແຂວງ, ເຊິ່ງແຕ່ລະພາກສ່ວນລ້ວນແຕ່ສະແດງຄວາມເປັນເອກະພາບ ຕໍ່ບົດລາຍງານການເມືອງ, ແຜນພັດທະນາເສດຖະກິດ – ສັງຄົມ ເຮັດໃຫ້ກອງປະຊຸມມີເນື້ອໃນອຸດົມສົມບູນຂື້ນ. ທີ່ສຳຄັນຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ລົງຄະແນນສຽງເລືອກເອົາຄະນະບໍລິຫານງານພັກເມືອງງາ, ຊຸດທີ XI ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງ ແລະ ສອດຄ່ອງກັບມາດຖານເງື່ອນໄຂທີ່ກຳນົດໄວ້ໃນກົດລະບຽບຂອງພັກປະຊາຊົນປະຕິວັດລາວ ສະໄໝທີ X, ເຊິ່ງມີຜູ້ສະໝັກຮັບເລືອກຕັ້ງທັງໝົດ 27 ສະຫາຍ, ຍິງ 5 ສະຫາຍ ເລືອກຕັ້ງໄດ້ 23 ສະຫາຍ, ຍິງ 3 ສະຫາຍ, ກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກເມືອງງາ ຄັ້ງທີ XI ໄດ້ເລືອກເອົາຄະນະປະຈຳພັກເມືອງ ເຊິ່ງມີຜູ້ສະໝັກຮັບເລືອກຕັ້ງ 9 ສະຫາຍ, ເລືອກຕັ້ງໄດ້ 7 ສະຫາຍ ຍິງ 1 ສະຫາຍ, ໃນນັ້ນ ໄດ້ເປັນເອກະສັນກັນຢ່າງສົມບູນເລືອກເອົາສະຫາຍ ນາງ ມະນີຈັນ ວິໄລຈິດ ເປັນເລຂາຄະນະບໍລິຫານງານພັກເມືອງ, ສະຫາຍ ວຽງໄຊ ຄໍາພະຈັນ ແລະ ສະຫາຍ ບຸນທີ ໄຊຍະວົງ ເປັນຮອງເລຂາຄະນະພັກເມືອງ, ເລືອກເອົາ ສະຫາຍ ບຸນທີ ໄຊຍະວົງ ເປັນປະທານກວດກາພັກ, ສະຫາຍ ເຊັງທໍ່ ສີດາວເພັດ ແລະ ສະຫາຍ ສຸວັນ ພົນອາສາ ເປັນຮອງປະທານກວດກາພັກ. ພ້ອມທັງໄດ້ປ່ອນບັດເລືອກຕັ້ງຜູ້ແທນສົມບູນ ແລະ ສໍາຮອງເຂົ້າຮ່ວມກອງປະຊຸມໃຫຍ່ຄັ້ງທີ IX ອົງຄະນະພັກແຂວງອຸດົມໄຊ ຈຳນວນ 18 ສະຫາຍ, ຍີງ 2 ສະຫາຍ, ຜູ້ແທນສໍາຮອງ 3 ສະຫາຍ, ຍີງ 1 ສະຫາຍ. ກອງປະຊຸມໃຫຍ່ໄດ້ຮັບຟັງການໂອ້ລົມຂອງສະຫາຍ ປອ ຄໍາພັນ ເຜີຍຍະວົງ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງອຸດົມໄຊ, ເຊິ່ງທ່ານໄດ້ຍ້ອງຍໍຊົມເຊີຍຕໍ່ຄະນະພັກຊຸດເກົ່າທີ່ໄດ້ຊີ້ນຳ-ນຳພາຈັດຕັ້ງປະຕິບັດໜ້າທີ່ການເມືອງ, ສາມາດຍາດໄດ້ໄຊຊະນະ ແລະ ມີຜົນສຳເລັດໃນຫຼາຍດ້ານ, ພ້ອມກັນນີ້ ໄດ້ຮຽກຮ້ອງໃຫ້ຄະນະພັກຊຸດໃໝ່ຈະຕ້ອງໄດ້ສືບຕໍ່ປັບປຸງແກ້ໄຂບັນດາບັນຫາທີ່ຍັງຄົງຄ້າງໃນໄລຍະທີ່ຜ່ານມາ, ທັງໄດ້ໃຫ້ທິດຊີ້ນໍາຕໍ່ຄະນະພັກຊຸດໃໝ່ທີ່ຈະສືບຕໍ່ຊີ້ນຳ -ນຳພາ ໃນການຫັນເອົາມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກເມືອງງາ ໄປສູ່ຊີວິດຕົວຈິງໃຫ້ປະສົບຜົນສຳເລັດ. ກອງປະຊຸມໃຫຍ່,ໄດ້ຮຽກຮ້ອງມາຍັງຄະນະພັກ, ສະມາຊິກພັກ, ພະນັກງານ ແລະ ປະຊາຊົນບັນດາເຜົ່າຈົ່ງເຊີດຊູສະຕິ ແລະ ຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງຂື້ນເລື້ອຍໆ ເຮັດໃຫ້ບັນດາຄາດໝາຍທີ່ກອງປະຊຸມໃຫຍ່ຄັ້ງນີ້ໄດ້ຮັບການຈັດຕັ້ງປະຕິບັດ ແລະ ມີການຫັນປຽນໃໝ່ທີ່ຕັ້ງໜ້າ, ເຮັດໃຫ້ພັກມີຄວາມເຂັ້ມແຂງປອດໃສ, ໜັກແໜ້ນ ສາມາດນຳພາພັດທະນາເມືອງງາ ກ້າວຂື້ນຢ່າງບໍ່ຢຸດຢັ້ງ.