ກອງປະຊຸມໃຫຍ່ ຜູ້ແທນອົງຄະນະພັກ ເມືອງໄຊ ຄັ້ງທີ XIII ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 30 ຕຸລາ 2019 ນີ້ ຢູ່ທີ່ສະໂມສອນຂອງແຂວງ ໂດຍພາຍໃຕ້ການເປັນປະທານຂອງ ສະຫາຍ ວາລີ ຈືນໍເຢັງ ເລຂາພັກເມືອງ ເຈົ້າເມືອງໆໄຊ.

ເປັນກຽດເຂົ້າຮ່ວມມີ ສະຫາຍ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ. ມີຄະນະປະຈຳພັກແຂວງ, ຮອງເລຂາພັກເມືອງ, ພະນັກງານອາວຸໂສບຳນານ, ອະດິດການນຳເມືອງ, ຜູ້ແທນສົມບູນ ທີ່ເປັນຕົວແທນໃຫ້ແກ່ສະມາຊິກພັກຈຳນວນ 2.590 ສະຫາຍ, ຍິງ 612 ສະຫາຍ ທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງໄຊເຂົ້່າຮ່ວມທັງໝົດ 128 ສະຫາຍ, ຍິງ 9 ສະຫາຍ ພ້ອມດ້ວຍ ແຂກຮັບເຊີນທີ່ມາຈາກຂັ້ນແຂວງ ແລະ ບັນດາເມືອງຂອງແຂວງ ອຸດົມໄຊ, ເມືອງນ້ຳບາກ ແຂວງຫລວງພະບາງ ເຂົ້າຮ່ວມ.

ກອງປະຊຸມ ໄດ້ຍົກສູງຄວາມຮັບຜິດຊອບ, ສຸມສະຕິປັນຍາຂອງຕົນເຂົ້າໃນການຄົ້ນຄວ້າປະກອບຄໍາເຫັນຕໍ່ກອງປະຊຸມຢ່າງກົງໄປກົງມາ, ເຊິ່ງໄດ້ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ປະສົບຜົນສຳເລັດຢ່າງສະຫງ່າງາມຕາມຈຸດປະສົງ ແລະ ລະດັບຄາດໝາຍຂອງກອງປະຊຸມທີ່ໄດ້ກຳນົດໄວ້. ກອງປະຊຸມໄດ້ເປັນເອກະສັນຮັບຮອງເອົາບັນດາເນື້ອໃນສໍາຄັນຄື: ພ້ອມກັນຄົ້ນຄ້ວາ ແລະ ປະກອບຄໍາເຫັນໃສ່ບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ່ V, ທິດທາງລວມ ແລະ ຄາດໝາຍສູ້ຊົນຕົ້ນຕໍ, ວຽກງານຈຸດສຸມແຕ່ລະດ້ານ ແລະ ບົດສໍາຫຼວດການນໍາພາລວມຂອງຄະນະບໍລິຫານງານພັກຊຸດທີ XII. ໃນນັ້ນ ໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນໃນການຊີ້ນໍາ-ນໍາພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XII ໃນ 5 ປີ ຜ່ານມາ. ພ້ອມນີ້ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງລວມ ແລະ ຄາດໝາຍສູ້ຊົນຕົ້ນຕໍ, ວຽກງານຈຸດສຸມແຕ່ລະດ້ານ 5 ປີ (2020-2024) ຄື: ຍູ້ແຮງການຫັນປ່ຽນໂຄງປະກອບເສດຖະກິດໃຫ້ຖືກທິດພັດທະນາຍືນຍົງ, ສີຂຽວ; ສ້າງອາຊີບປະຊາຊົນຢູ່ຊົນນະບົດ ທີ່ຕິດພັນກັບການປົກປັກຮັກສາຄວາມອຸດົມສົມບູນ ຂອງທໍາມະຊາດ; ພັດທະນາວິສາຫະກິດ, ຜູ້ປະກອບການ-ນັກທຸລະກິດ; ພັດທະນາເສດຖະກິດ-ສັງຄົມໃຫ້ເປັນລະບົບຄົບຊຸດ, ຊຸກຍູ້ການພັດທະນາຕົວເມືອງຕິດພັນກັບການພັດທະນາຊົນນະບົດ; ເພີ່ມທະວີການດຶງດູດການລົງທຶນພາຍໃນ ແລະ ຕ່າງປະເທດ. ຮັບປະກັນລະດັບການເພີ່ມມູນຄ່າການຜະລິດ ສະເລ່ຍໄລຍະ 2020-2024ໃຫ້ບັນລຸ 7% ຕໍ່ປີ ຂຶ້ນໄປ ໃນນັ້ນ: ກະສິກໍາ-ປ່າໄມ້ ເພີ່ມຂຶ້ນສະເລ່ຍ 4,21%; ອຸດສະຫະກໍາ ເພີ່ມຂຶ້ນສະເລ່ຍ 9,67% ແລະ ການບໍລິການ ເພີ່ມຂຶ້ນສະເລ່ຍ 7,13%; ລາຍຮັບສະເລ່ຍຕໍ່ຫົວຄົນ ປີ 2024 ບັນລຸ 16.400.000 ກວ່າກີບ, ເທົ່າກັບ 1.960 ໂດລາສະຫະລັດ, ຍົກສູງຄຸນນະພາບການເຄື່ອນໄຫວວຽກງານ ວັດທະນະທໍາ-ສັງຄົມ, ປະຕິບັດນະໂຍບາຍສະຫວັດດີການ, ຮັບປະກັນການພັດທະນາຊັບພະຍາກອນມະນຸດ, ຍົກສູງຄຸນນະພາບ ຂອງບຸກຄະລາກອນ ແລະ ຍົກສູງຄຸນນະພາບຊີວິດ ຂອງປະຊາຊົນ, ອາຍຸຍືນສະເລ່ຍຂອງພົນລະເມືອງໃຫ້ບັນລຸ 70 ປີ, ເພີ່ມທະວີການປະຕິບັດໜ້າທີ່ຍຸດທະສາດ ປ້ອງກັນຊາດ, ປ້ອງກັນຄວາມສະຫງົບທົ່ວປວງຊົນຮອບດ້ານ, ຮັບປະກັນສະຖຽນລະພາບ ແລະ ຄວາມໝັ້ນຄົງ ຂອງທ້ອງຖິ່ນ-ຮາກຖານ, ຍົກສູງປະສິດທິພາບການຄຸ້ມຄອງ-ບໍລິຫານລັດ ຂັ້ນເມືອງ ຫຼື ຂະແໜງການ ແລະ ຂັ້ນບ້ານ ຕິດພັນກັບການຫັນເປັນທັນສະໄໝ, ຮັບໃຊ້ປະຊາຊົນ, ເສີມຂະຫຍາຍມູນເຊື້ອສາມັກຄີປອງດອງ ປະຊາຊົນ ບັນດາເຜົ່າ ຕິດພັນກັບການເຊີດຊູບົດບາດ ຂອງແນວລາວສ້າງຊາດ ແລະ ບັນດາອົງການຈັດຕັ້ງການເມືອງ-ສັງຄົມ, ເປັນເຈົ້າການເສີິມຂະຫຍາຍການພົວພັນຮ່ວມມືກັບຕ່າງປະເທດ, ນໍາຜົນປະໂຫຍດຕົວຈິງມາໃຫ້ທ້ອງຖິ່ນ, ຂະແໜງການ, ສືບຕໍ່ຍູ້ແຮງການສ້າງພັກໃຫ້ປອດໃສ, ເຂັ້ມແຂງ, ແໜັກແໜ້ນ ໂດຍຕິດພັນກັບ ການຍົກສູງຄຸນນະພາບວຽກງານການເມືອງ, ແນວຄິດ; ການຈັດຕັ້ງ ແລະ ແບບແຜນນໍາພາ ຂອງຄະນະພັກ, ເພີ່ມທະວີ ແລະ ຍົກສູງຄວາມສັກສິດ ຂອງວຽກງານກວດກາ, ປ່ຽນແປງໃໝ່ວຽກງານພະນັກງານ, ຮັບປະກັນບົດບາດຕັດສິນຜົນໄດ້ ຜົນເສຍຂອງວຽກງານ, ຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກໃຫ້ປະກົດຜົນເປັນຈິງ, ກອງປະຊຸມໄດ້ຮັບຟັງ ການລາຍງານ ແລະ ການປະກອບຄໍາຄິດຄໍາເຫັນ ຈາກຜູ້ຕາງໜ້າຫຼາຍພາກສ່ວນ ເຊິ່ງແຕ່ລະພາກສ່ວນ ລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບຕໍ່ບົດລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ, ການລາຍງານ ແລະ ປະ ກອບຄໍາເຫັນສ່ວນຫຼາຍໄດ້ລົງເລິກ ຜົນສໍາເລັດແຫ່ງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XII ເຂົ້າໃນຂົງເຂດກົມກອງ ແລະ ຂະແໜງການຂອງຕົນອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂື້ນຕື່ມ.

ກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະ ບໍລິຫານງານພັກເມືອງໄຊຊຸດທີ XIII ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງ ແລະ ສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ສະໝັກເລືອກຕັ້ງທັງໝົດ 29 ສະຫາຍ, ຍິງ 4 ສະຫາຍ, ເລືອກໄດ້ 25 ສະຫາຍ, ຍິງ 4 ສະຫາຍ, ກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກເມືອງໄຊ ຄັ້ງທີ XIII ໄດ້ເປັນເອກະສັນ ເລືອກຕັ້ງເອົາຄະນະປະຈຳ, ເລຂາ, ຮອງເລຂາຄະນະພັກຊຸດໃໝ່ ເລືອກຕັ້ງຄະນະປະຈໍາດ້ວຍການປ່ອນບັດໃນກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກເມືອງໄຊສະໄໝທີ XIII, ມີຜູ້ສະໝັກເລືອກຕັ້ງ 9 ສະຫາຍ, ເລືອກໄດ້ 7 ສະຫາຍ, ຍິງ 1 ສະຫາຍຄື: ສະຫາຍ ວາລີ ຈື່ນໍເຢັງ, ສະຫາຍ ຫົງທອງ ອິນທະວົງ, ສະຫາຍ ສົມຈັນ ເທບພາລີ, ສະຫາຍ ພົມມະສຸກ ມອນຈັນດີ, ສະຫາຍ ພັນໂທ ສົມເພັດ ສຸລິວັນ, ສະຫາຍ ນາງ ຈັນທີ ສີສະຫວາດ, ສະຫາຍ ຄຳດາ ຟົງມະນີ. ເລືອກຕັ້ງເອົາເລຂາ, ຮອງເລຂາຄະນະບໍລິຫານງານພັກເມືອງໄຊສະໄໝທີ XIII ຄື: ເລືອກເອົາສະຫາຍ ວາລີ ຈືນໍເຢັງ ເປັນເລຂາຄະນະພັກ, ສະຫາຍ ຫົງທອງ ອິນທະວົງ ແລະ ສະຫາຍ ສົມຈັນ ເທບພາລີ ເປັນຮອງເລຂາຄະນະພັກ, ເລືອກຕັ້ງເອົາປະທານ, ຮອງປະທານກວດກາພັກຄື: ສະຫາຍ ສົມຈັນ ເທບພາລີ ເປັນປະທານກວດກາ, ສະຫາຍ ຄຳເຍືອ ໄຊຍະເກດ ແລະ ສະຫາຍ ຈັນທີ ດາວວົງເດືອນ ເປັນຮອງປະທານກວດກາ. ກອງປະຊຸມໃຫ່ຍໄດ້ເປັນເອກະສັນ ຮັບຮອງເອົາຜູ້ແທນສົມບຸນ ໄປຮ່ວມກອງປະຊຸມໃຫ່ຍ ອົງຄະນະພັກແຂວງ ຄັ້ງທີ IX ຈໍານວນ 22 ສະຫາຍ, ຍິງ 3 ສະຫາຍ. ຕອນທ້າຍກອງປະຊຸມ ໄດ້ຮັບຟັງການໂອ້ລົມ ຂອງສະຫາຍ ຄຳພັນ ເຜີຍຍະວົງ ກຳມະການສູນກາງພັກ, ເລຂາຄະບໍລິຫານງານພັກແຂວງ, ເຈົ້າແຂວງອຸດົມໄຊ. ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຄະນະພັກຊຸດທີ XII ທີ່ໄດ້ຊີ້ນຳ-ນຳພາພະນັກງານ, ສະມາຊິກພັກ, ປະຊາຊົນບັນດາເຜົ່າ ປະຕິບັດໜ້າທີ່ການເມືອງ ສາມາດຍາດໄດ້ໄຊຊະນະ ແລະ ມີຜົນສຳເລັດໃນຫຼາຍດ້ານ ພ້ອມກັນນີ້ ສະຫາຍຍັງໄດ້ສະແດງຄວາມເປັນຫ່ວງ ເປັນໄຍຕໍ່ບັນຫາທີ່ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະພັກຊຸດໃໝ່ ຈະຕ້ອງໄດ້ສືບຕໍ່ປັບປຸງແກ້ໄຂ, ຈາກນັ້ນ; ສະຫາຍໃຫ້ທິດຊີ້ນໍາແຕ່ລະດ້ານໃນທາງທີ່ສ້າງສັນ, ມີຄວາມເຊື່ອໝັ້ນຕໍ່ຄະນະພັກຊຸດໃໝ່ທີ່ຈະສືບຕໍ່ ຊີ້ນຳ-ນຳພາ ຈັດຕັ້ງປະຕິບັດມະຕິກອງປະຊຸມໃຫຍ່ອົງຄະນະພັກເມືອງໄຊ ຄັ້ງທີ XIII ໃຫ້ມີຜົນສຳເລັດຍິ່ງໃຫຍ່ກ່ວາເກົ່າ. ກອງປະຊຸມຍັງໄດ້ຮຽກຮ້ອງມາຍັງສະມາຊິກພັກ, ພະນັກງານ ແລະ ປະຊາຊົນບັນດາເຜົ່າຈົ່ງເຊີດຊູສະຕິ ແລະ ຄວາມຮັບຜິດຊອບໜ້າທີ່ການເມືອງ ຂອງຕົນໃຫ້ສູງຂື້ນເລື້ອຍໆ ເຮັດໃຫ້ບັນດາຄາດໝາຍ ທີ່ກອງປະຊຸມໃຫຍ່ກຳນົດອອກໄດ້ຮັບການຈັດຕັ້ງປະຕິບັດ ແລະ ມີການຫັນປ່ຽນໃໝ່ທີ່ຕັ້ງໜ້າ, ເຮັດໃຫ້ພັກມີຄວາມເຂັ້ມແຂງ, ປອດໃສ, ໜັກແໜ້ນ ແລະ ພັດທະນາເມືອງໄຊກ້າວຂື້ນຢ່າງບໍ່ຍຸດຍັ້ງ.